Villa Romana de Toralla e Centro de Interpretación Mundo Romano

A través do Centro de Interpretación do Mundo Romano de Vigo (en adiante, CIMR), o Concello pretende achegar á cidadanía, propia e foránea, a historia de Vigo, utilizando recursos moi variados en forma de reconstrucións, maquetas, debuxos, dioramas.... Percorrendo estes espazos, o visitante achegarase ao mundo romano e á súa influencia na nosa cidade e, concretamente, nunha economía sustentada na pesca e actividades relacionadas con ela, onde Vigo foi un área moi salientable no noroeste peninsular. Ao mesmo tempo, o CIMR constitúese como o primeiro paso e o marco xeral que permitirá a interpretación do xacemento arqueolóxico situado ao seu carón, a Villa Romana de Toralla, preparando ao visitante para a mellor comprensión dos restos atopados (a propia villa e a salina) vinculados ás actividades da pesca e salgadura

Neste xacemento arqueolóxico pode visitarse unha “Vila a Mare” romana de tipoloxía atlántica, que serviu de residencia para unha familia galaico-romana de elevado status entre fins do Século III e inicios o Século V d.n.e. Trátase dunha residencia unifamiliar dotada, na súa Pars Urbana ou doméstica, de elementos de luxo e prestixio que nos permiten facernos unha idea clara sobre o elevado status socioeconómico do que gozaban os seus propietarios.

Pero estas Villae non só eran grandes e luxosas residencias da elite Galaico-romana do momento, senón que xogan un papel capital na explotación dos recursos económicos do territorio. Así, na súa Pars Rústica ou frumentaria, estas familias ocupábanse da xestión do negocio que lles permitía manter o control sobre os medios de produción.